Aksjon boligbrann 2009
Desember er den månaden det brenn mest i Noreg. Brannsjef Dick Brevik ynskjer å setje fokus på branntryggleik.
Desember er den månaden det brenn mest i Noreg, og i juleveka er det to til tre gonger så mange bustadbrannar som i ei gjennomsnittsveke. Likevel går cirka 500 000 menneske i Noreg inn i denne månaden utan tilstrekkeleg varsling i tilfelle brann.
For å setje søkelyset på branntryggleik i heimen, vert kampanjen Aksjon bustadbrann arrangert i desember. Direktoratet for samfunnstryggleik og beredskap, Norsk brannvernforening og Gjensidige står bak kampanjen, medan representantar frå brann-/feiarvesen, det lokale elektrisitetstilsyn og lokale Gjensidige-kontor står for den praktiske gjennomføringa. Lokalt er det Aukra brannvesen som står for gjennomføringa av kampanjen.
Større brannhyppigheit i jula har samanheng med stor aktivitet i heimen, med auka bruk av elektrisitet, levande lys og peiskos, i mange tilfelle også i kombinasjon med alkoholbruk
- Det er ei billig livsforsikring å ha røykvarslarar i bustaden. Røykvarslarar reddar kvart år minst 10-20 liv i Noreg om dei vert ettersett kvart år.
Opptil 40 000 husstandar over heile landet får i løpet av veke 48 – 49 – 50 – 51 i desember besøk av lokale brann-/feiarvesen og elektrisitetstilsyn, med tilbod om gratis og uforpliktande sjekk av el- og branntryggleiken i bustaden.
- Det dreier seg ikkje om eit tilsyn i vanleg forstand, men om ein enkel kontroll med rettleiing og informasjon. For bebuarane er sjekken frivillig, og kontrollørane vil legitimere seg når dei ringjer på.
Kvart husbesøk tek cirka 30 minutt med kontroll av følgjande forhold:
- Varslingsutstyr
- Sløkkjeutstyr
- Elektriske apparat og anlegg
- Eldstader og skorstein
- Rømingsforhold
Meir informasjon om førebyggjande brannvern finn de på www.aksjonboligbrann.no.
Kontaktpersonar lokalt:
Brannsjef: Dick Brevik
Varabrannsjef: Jon-Gunnar Gjeldberg