Søknad frå Mowi Seawater Norway AS om løyve til å endre areal og utforming av akvakulturanlegg på lokalitet 12988, Aukrasanden, Aukra kommune - offentleg ettersyn

Høyringsuttale – søknad om endring av areal og utforming
Akvakulturanlegg lokalitet 12988 Aukrasanden, Aukra kommune

Det vert vist til søknad frå Mowi Seawater Norway AS om løyve til endring av areal og utforming av akvakulturanlegget på lokalitet 12988, Aukrasanden.

Underteikna stiller seg negativ til søknaden. Motsegna er i hovudsak knytt til lokalisering og utforming av anlegget, og dei konkrete konsekvensane dette har for nærmiljø og miljøtilstand i området.
Plasseringa av anlegget i umiddelbar nærleik til ferjeanløpet til Aukra medfører svært høg landskapsmessig eksponering. Tiltaket framstår som visuelt dominerande og skjemmande, og påverkar opplevinga av ankomst til øya samt bu- og nærmiljøet for busetnaden på Aukrasanden på ein uheldig måte. Tiltaket bryt med omsynet til kystlandskapet som fellesgode og allmenta si oppleving av området, jf. plan- og bygningslova § 1-1 om berekraftig utvikling og omsynet til gode visuelle kvalitetar i omgjevnadene.
Vidare har drifta av anlegget over tid medført belastningar for nærmiljøet i form av støy og omfattande lysforureining, særleg knytt til nattdrift, teknisk utstyr og serviceoperasjonar. Støy om natta, då særleg i sommarhalvåret vert både fine sommarkveldar og kvile øydelagt. Heile året verkar nattleg lysbruk og aktivitet forstyrrande og reduserer moglegheita for kvile og normal bruk av bustad og uteområde. Lysforureininga bryt òg med omsynet til mørke landskap og naturleg lyskvalitet i kystsona, og kan påverke naturmiljøet negativt, jf. naturmangfaldlova § 8 (kunnskapsgrunnlaget) og § 9 (føre-var-prinsippet).
Det er dokumentert forureining og forsøpling av strandsona, jf. høyringsuttale frå Roald Borthne, der forholda er underbygde med biletdokumentasjon. Dette viser at drifta allereie medfører uønskt miljøpåverknad i området, jf. forureiningslova § 7 om plikt til å unngå forureining.
Desse forholda har samla sett negative konsekvensar for trivsel og livskvalitet for busette i området, for naturmiljøet, og for allmenta si bruk av kystsona til frilufts- og rekreasjonsføremål. Ei utviding vil forsterke ei allereie eksisterande belastning, og det må gjerast ei konkret vurdering av samla påverknad i tråd med naturmangfaldlova § 10 om økosystemtilnærming og samla belastning, samt §§ 11–12 om kostnadene ved miljøforringing og miljøforsvarlege driftsmetodar.
Omsøkt endring og utviding vurderast å kunne forsterke dei eksisterande konfliktane mellom akvakulturverksemda og omsynet til landskap, miljø og bumiljø. Det vert òg stilt spørsmål ved om alternative lokaliseringar med lågare konfliktpotensial er tilstrekkeleg greidde ut, jf. naturmangfaldlova § 12.

Etter ei samla vurdering framstår tiltaket som lite foreinleg med prinsippa om heilskapleg og berekraftig arealforvaltning i kystsona, jf. plan- og bygningslova § 1-1, samt omsynet til miljø og menneskeleg helse.
På bakgrunn av dei samla negative konsekvensane for landskap, miljø og bumiljø vert det tilrådd at søknaden vert avslått. Dersom søknaden likevel vert vurdert imøtekomen, må det føresetjast at alternative lokaliseringar med lågare konfliktpotensial vert greidde ut, og at det vert stilt strenge vilkår når det gjeld støy, lysbruk, visuelt uttrykk og forureining.

Underteikna:
Reidun Rød
Ivar Rød
Inger Johanne Moene
Elin Rød
Knut Erik Rød

I flg skisse ser det ut som det nå skal legges ut 2x 6 mærer.Tidligere har det vert 2x5 mærer. totalt 10 stk
Er det i.h.t den opprinnelige konsesjon at det nå økes til totalt 12 stk